యుద్ధం ముగిసింది.. పెట్రోల్, డీజిల్ ధరల తగ్గుదలపై బిగ్ క్లారిటీ!

పశ్చిమాసియాలో గత 100 రోజులుగా సాగుతున్న అమెరికా-ఇరాన్ యుద్ధం ఎట్టకేలకు ముగియడంతో అంతర్జాతీయ మార్కెట్లో కీలక పరిణామాలు చోటుచేసుకున్నాయి. అమెరికా అధ్యక్షుడు డొనాల్డ్ ట్రంప్, ఇరాన్ అధ్యక్షుడు మసూద్ పెజెష్కియాన్ వర్చువల్ విధానంలో 14 అంశాల చారిత్రాత్మక ఒప్పందంపై సంతకాలు చేశారు. దీంతో హార్మూజ్ జలసంధి పూర్తిగా తెరుచుకోవడమే కాకుండా, అంతర్జాతీయ నౌకల సురక్షిత ప్రయాణానికి మార్గం సుగమమైంది. ఈ యుద్ధ ముగింపు ప్రభావంతో అంతర్జాతీయ మార్కెట్లో క్రూడ్ ఆయిల్ ధరలు ఒక్కసారిగా పడిపోయాయి. ప్రస్తుతం బ్రెంట్ క్రూడ్ ధర బ్యారెల్‌కు 78 డాలర్ల కంటే తక్కువకు చేరగా,క్రూడ్ ధర 76 డాలర్ల మార్కును తాకింది. గత వంద రోజులుగా ఉన్న సప్లై అడ్డంకులు పూర్తిగా తొలగిపోవడంతో అంతర్జాతీయంగా ముడిచమురు సరఫరా వేగవంతమైంది. ఫలితంగా అంతర్జాతీయ చమురు మార్కెట్ తీవ్రమైన ఒడిదుడుకుల నుంచి ఉపశమనం పొందింది. ఇదిలా ఉండగా, అంతర్జాతీయంగా ధరలు దిగివచ్చినా భారత్‌లో మాత్రం ఇంధన ధరలలో ఇప్పటివరకు ఎలాంటి మార్పూ కనిపించలేదు. యుద్ధం నడుస్తున్న సమయంలో మనదేశంలో 4 సార్లు పెట్రోల్, డీజిల్ ధరలు పెరిగి, మొత్తంగా లీటరుకు రూ.7.5 నుంచి రూ.8 వరకు భారం పడింది. అంతర్జాతీయంగా క్రూడ్ ఆయిల్ ధరలు భారీగా పతనమైనప్పటికీ, మన దేశీయ మార్కెట్లో ప్రస్తుతానికి పాత ధరలే కొనసాగుతుండడం గమనార్హం. ఈ నేపథ్యంలో దేశంలోని ప్రధాన నగరాల్లో ఇంధన ధరలు పరిశీలిస్తే, దేశ రాజధాని దిల్లీలో లీటర్ పెట్రోల్ ₹102 కాగా, డీజిల్ ₹95.20 గా ఉంది. తెలంగాణ రాజధాని హైదరాబాద్‌లో పెట్రోల్ రేటు ₹115.73 కి చేరగా, డీజిల్ ధర ₹103.82 వద్ద కొనసాగుతోంది. ఆర్థిక రాజధాని ముంబైలో పెట్రోల్ ₹113.51 పలుకుతుండగా, డీజిల్ ధర ₹97.83 వద్ద స్థిరంగా కొనసాగుతోంది. దీంతో ఆయిల్ మార్కెటింగ్ కంపెనీల అండర్ రికవరీలు భారీగా తగ్గుముఖం పట్టడం సామాన్యులకు ఒక పెద్ద ఊరటనిచ్చే అంశం. పెట్రోల్‌పై కంపెనీల నష్టం ₹24 నుంచి కేవలం ₹3కి పడిపోగా, డీజిల్‌పై లాస్ ₹105 నుంచి ₹27కి తగ్గింది. ఈ భారీ మార్పుల నేపథ్యంలో రాబోయే రోజుల్లో దేశీయంగా ఇంధన ధరల తగ్గుదలపై సామాన్యుల్లో ఆశలు రేకెత్తుతున్నాయి. ఫలితంగా హార్మూజ్ జలసంధి పూర్తిగా అందుబాటులోకి వచ్చిన తర్వాత రాబోయే 60 రోజుల్లో ఇంధన ధరలు తగ్గే అవకాశం ఉంది. అంతర్జాతీయంగా సప్లై లైన్స్ పునరుద్ధరణ కావడం, కంపెనీల నష్టాలు తగ్గడం ధరల తగ్గింపునకు అనుకూలించే ప్రధాన అంశాలు. అయితే చమురు కంపెనీలు ఈ లాభాలను వినియోగదారులకు ఎప్పుడు బదిలీ చేస్తాయనే దానిపైనే ప్రస్తుత ఉత్కంఠ అంతా నెలకొని ఉంది.