కవిత, పొన్నంకు గట్టి కౌంటర్ ఇచ్చిన జనసేన నేత సాగర్

జనసేన అధినేత పవన్ కల్యాణ్ పై వ్యాఖ్యలు చేసిన మంత్రి పొన్నం ప్రభాకర్, కవితలపై తెలంగాణ జనసేన నేతలు సాగర్, శంకర్ గౌడ్ తీవ్రస్థాయిలో ధ్వజమెత్తారు. పవన్‌ను అడ్డుకునే స్థాయి మీకు లేదంటూ వారు ఘాటుగా కౌంటర్ ఇచ్చారు. ఒక బాధ్యతాయుతమైన మంత్రి పదవిలో ఉండి పవన్ గురించి అలా మాట్లాడడం ఏమాత్రం సరికాదని మండిపడ్డారు. ప్రస్తుతం పిఠాపురం ప్రజలు పవన్‌ను దేవుడిగా చూస్తున్నారని వారు ఈ సందర్భంగా గుర్తు చేశారు. సినిమా నటుడు అయితే రాజకీయాల్లోకి రాకూడదా అని వారు ప్రశ్నించారు. పవన్ తెలంగాణకు వస్తున్నారనే సమాచారంతోనే ఇక్కడి మంత్రులకు భయం మొదలైందని వారు విమర్శించారు. గతంలో కొండగట్టుకి పవన్ డబ్బులు ఇచ్చినప్పుడు ఈ నేతలు ఎందుకు మాట్లాడలేదని జనసేన నాయకులు ప్రశ్నించారు. ఇదిలా ఉండగా, పవన్ కల్యాణ్ పై వ్యాఖ్యలు చేసిన కవిత గెటప్‌ను సాగర్ విమర్శిస్తూ ఆమెను 2.0 తో పోల్చారు. జనసేన పార్టీ త్వరలోనే తెలంగాణలో భారీ మీటింగ్ ఏర్పాటు చేయబోతోందని ఆయన స్పష్టం చేశారు. ఈ మీటింగ్ ద్వారా రాష్ట్ర రాజకీయాల్లో ఖచ్చితంగా మార్పులు రాబోతున్నాయని ఆయన ధీమా వ్యక్తం చేశారు. పవన్ తెలంగాణకు వస్తాడని అనగానే కవిత ఎందుకు అంతగా భయపడుతున్నారో చెప్పాలని డిమాండ్ చేశారు.రాజకీయాల్లోకి కొత్త తరం నాయకులు రాకూడదా అని శంకర్ గౌడ్ ప్రశ్నించారు. ఏపీలో జరిగిన ఎన్నికల్లో జనసేన 21 సీట్లలో పోటీ చేసి అన్ని స్థానాల్లోనూ విజయం సాధించిందని గుర్తు చేశారు. అదేవిధంగా తెలంగాణలో కూడా వచ్చే ఎన్నికల్లో ఖచ్చితంగా గెలిచి తీరుతామని ఆయన స్పష్టం చేశారు. ఈ నేపథ్యంలో దేశానికి పవన్ నేత అవుతాడని గతంలో గద్దర్ చెప్పిన మాటలను ఆయన ఉదహరించారు. మీ తండ్రి కేసీఆర్ ఇతర రాష్ట్రాల్లో పార్టీ పెట్టేటప్పుడు ఎందుకు ప్రశ్నించలేదని కవితను నిలదీశారు. ఫలితంగా ఈ వ్యవహారం ఇప్పుడు రాజకీయంగా తీవ్ర చర్చనీయాంశంగా మారింది.