కరుప్పు సినిమా విడుదలకు ఆర్థిక అడ్డంకులు.. షోలు రద్దు

కోలీవుడ్ స్టార్ హీరో సూర్య నటించిన కరుప్పు సినిమా రిలీజ్ చివరి నిమిషంలో తీవ్ర గందరగోళంలో పడింది. మే 14,న ప్రపంచవ్యాప్తంగా గ్రాండ్‌గా విడుదల కావాల్సిన ఈ చిత్రం ఆర్థిక కారణాలతో నిలిచిపోయింది. దాదాపు 50 కోట్ల రూపాయల బకాయిలు చెల్లించాల్సి ఉండటంతో థియేటర్లలో షోలు రద్దవుతున్నాయి. దీంతో ఆన్‌లైన్ ప్లాట్‌ఫారమ్‌లు బుకింగ్స్‌ను నిలిపివేసి ప్రేక్షకులకు రిఫండ్స్ ఇస్తున్నాయి. ముఖ్యంగా అమెరికాలోని ప్రధాన థియేటర్ చైన్స్ ప్రీమియర్స్ తో పాటు వీకెండ్ షోలను కూడా తొలగించాయి. కరుప్పు సినిమా రిలీజ్ కోసం ఎదురుచూస్తున్న అభిమానులకు దర్శకుడు ఆర్జే బాలాజీ ఒక ప్రత్యేక అప్పీల్ చేశారు. నిర్మాతలు ప్రస్తుతం ఎదురైన ఆర్థిక ఇబ్బందులను పరిష్కరించే పనిలో ఉన్నారని ఆయన తెలిపారు. ఈ సినిమా మొదటి నుంచి ఎన్నో అడ్డంకులను ఎదుర్కొందని, దేవుడి దయతో వాటన్నింటినీ దాటామని పేర్కొన్నారు. ఈసారి కూడా సమస్య సర్దుకుంటుందని, రేపు ఉదయం కచ్చితంగా సినిమా విడుదలవుతుందని ఆయన ధీమా వ్యక్తం చేశారు. మరోవైపు ఉమా రాజేంద్ర, వాసు సినిమాస్ వంటి థియేటర్ల యాజమాన్యాలు కూడా రాత్రికి అప్‌డేట్ ఇస్తామని ప్రకటించాయి. ఇదిలా ఉండగా, కరుప్పు సినిమాపై ట్రేడ్ వర్గాల్లో భారీ అంచనాలు ఉన్నాయి. తమిళనాడులో కేవలం ఒక్క రోజులోనే 2 కోట్ల రూపాయలకు పైగా అడ్వాన్స్ బుకింగ్స్ జరిగాయి. డ్రీమ్ వారియర్ పిక్చర్స్ సుమారు 130 కోట్ల భారీ బడ్జెట్‌తో ఈ చిత్రాన్ని నిర్మించింది. నాన్-థియేట్రికల్ రైట్స్ రూపంలో ఇప్పటికే 110 కోట్లకు పైగా బిజినెస్ జరిగింది. అయినప్పటికీ, థియేట్రికల్ డిస్ట్రిబ్యూషన్ మరియు బకాయిల విషయంలో తలెత్తిన సమస్యలు విడుదలకు శాపంగా మారాయి. ఈ నేపథ్యంలో సూర్య-త్రిష కాంబినేషన్ కోసం వేచి చూస్తున్న ఫ్యాన్స్ తీవ్ర నిరాశకు గురవుతున్నారు. ఫలితంగా సోషల్ మీడియాలో తమ ఆందోళనను వ్యక్తం చేస్తున్నారు. భారీ ఓపెనింగ్స్ వస్తాయని భావిస్తున్న సమయంలో ఇలాంటి పరిణామాలు సినిమా కలెక్షన్లపై ప్రభావం చూపే అవకాశం ఉంది. నిర్మాతలు బకాయిలు చెల్లించి క్లియరెన్స్ పొందితేనే రేపు సినిమా థియేటర్లలోకి వచ్చే అవకాశం ఉంది. ప్రస్తుతానికి చిత్ర యూనిట్ ఇచ్చే అధికారిక ప్రకటన కోసం అంతా ఉత్కంఠగా ఎదురుచూస్తున్నారు.