రేపే భోగాపురం విమానాశ్రయం ప్రారంభం: మోదీ గ్రాండ్ ఎంట్రీ!

ఆంధ్రప్రదేశ్ రాష్ట్రంలో విమానయాన రంగం కొత్త చరిత్ర సృష్టించేందుకు సిద్ధమైంది. విజయనగరం జిల్లా భోగాపురంలో నిర్మించిన అల్లూరి సీతారామరాజు అంతర్జాతీయ విమానాశ్రయాన్ని శనివారం, ఆగస్టు 1న ప్రధాని నరేంద్ర మోదీ అధికారికంగా ప్రారంభించనున్నారు. శనివారం ఉదయం 11 గంటలకు భోగాపురం చేరుకోనున్న ప్రధాని, ముందుగా కొత్తగా నిర్మించిన ప్యాసింజర్ టెర్మినల్‌ను క్షుణ్ణంగా పరిశీలిస్తారు. అనంతరం ఉదయం 11:30 గంటల సమయంలో విమానాశ్రయాన్ని ప్రారంభించి జాతికి అంకితం చేస్తారు. ఈ కార్యక్రమంలో గవర్నర్ ఎస్ అబ్దుల్ నజీర్, ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్, కేంద్ర విమానయాన శాఖ మంత్రి కింజరాపు రామ్మోహన్ నాయుడుతో పాటు పలువురు ఉన్నతాధికారులు పాల్గొంటారు. ప్రభుత్వ-ప్రైవేట్ భాగస్వామ్యం విధానంలో రూ.5,640 కోట్లకు పైగా వ్యయంతో ఈ గ్రీన్ ఫీల్డ్ ఎయిర్‌పోర్టును అభివృద్ధి చేశారు. సంవత్సరానికి 60 లక్షల మంది ప్రయాణికులకు సేవలు అందించేలా దీని మొదటి విడత నిర్మాణాన్ని రూపకల్పన చేశారు. ప్రాంతీయ విమాన అనుసంధానాన్ని మెరుగుపరచడమే కాకుండా, ఉత్తరాంధ్రలో పర్యాటకం, వాణిజ్యం, పెట్టుబడులు మరియు ఉపాధి అవకాశాలను భారీగా పెంచడం ఈ ప్రాజెక్టు ముఖ్య ఉద్దేశం. దింతో ఈ ప్రాంతంలో ఆర్థిక కార్యకలాపాలు వేగవంతం కానున్నాయి. ఇదిలా ఉండగా ఈ విమానాశ్రయంలో అత్యాధునిక సాంకేతిక పరిజ్ఞానాన్ని వినియోగించారు. ఆర్టిఫిషియల్ ఇంటెలిజెన్స్, బిల్డింగ్ ఇన్ఫర్మేషన్ మోడలింగ్, ఎయిర్‌సైడ్ 4.0, బయోమెట్రిక్ పాసింజర్ ప్రాసెసింగ్, ఆటోమేటెడ్ లగేజ్ హ్యాండ్లింగ్ మరియు ప్రిడిక్టివ్ ఆపరేషన్స్ సెంటర్ వంటి వ్యవస్థలను ఇక్కడ ఏర్పాటు చేశారు. ఇవన్నీ ప్రయాణికులకు వేగవంతమైన, సురక్షితమైన ప్రయాణ అనుభవాన్ని అందిస్తాయి. ఫలితంగా ఉత్తరాంధ్ర రూపురేఖలు మారిపోనున్నాయని విశ్లేషకులు భావిస్తున్నారు. ఈ నేపథ్యంలో ప్రారంభోత్సవ వేదికపై నుంచే ప్రధాని మోదీ రూ.17,900 కోట్లకు పైగా విలువైన పలు అభివృద్ధి ప్రాజెక్టులకు శంకుస్థాపనలు మరియు ప్రారంభోత్సవాలు చేయనున్నారు. అనంతరం అక్కడ ఏర్పాటు చేసిన భారీ బహిరంగ సభను ఉద్దేశించి ఆయన ప్రసంగిస్తారు. ఈ పర్యటనతో రాష్ట్రంలో మౌలిక సదుపాయాల అభివృద్ధి మరింత వేగం పుంజుకోనుంది. చివరగా, ప్రస్తుతం విశాఖపట్నం విమానాశ్రయం నుండి నడుస్తున్న వాణిజ్య విమాన సర్వీసులన్నీ ఆగస్టు 17 నుండి భోగాపురం విమానాశ్రయానికి పూర్తిగా మారనున్నాయి. దీంతో ఆగస్టు 17 నుండి భోగాపురం నుంచే పూర్తిస్థాయి విమాన రాకపోకలు ప్రారంభమవుతాయి. ఈ కొత్త అంతర్జాతీయ విమానాశ్రయం అందుబాటులోకి రావడంతో ఆంధ్రప్రదేశ్ రవాణా వ్యవస్థలో సరికొత్త అధ్యాయం ప్రారంభం కానుంది.