పవన్ అన్న బతికిస్తే పేర్ని నాని చంపేశాడు: నిరంజన్ తండ్రి

హనుమకొండలో డ్యూచెన్ మస్కులర్ డిస్ట్రాఫీ అనే అరుదైన జన్యు వ్యాధితో పోరాడుతూ 17 ఏళ్ల వయసులో జూలై 8న మృతి చెందిన పవన్ కళ్యాణ్ అభిమాని పొనుగొటి నిరంజన్ వ్యవహారం ప్రస్తుతం రెండు రాష్ట్రాల్లో తీవ్ర సంచలనంగా మారింది. నిరంజన్ మరణానికి వైఎస్‌ఆర్‌సీపీ నాయకుడు, మాజీ మంత్రి పేర్ని నాని చేసిన రాజకీయ వ్యాఖ్యలే కారణమని అతని తండ్రి నేరుగా మీడియా ముందు ఆరోపించడం సంచలనం సృష్టిస్తోంది. దీర్ఘకాలంగా ప్రాణాంతక వ్యాధితో బాధపడుతున్న నిరంజన్ తన చివరి కోరికగా జనసేన అధినేత, ఆంధ్రప్రదేశ్ డెప్యూటీ సీఎం పవన్ కళ్యాణ్‌ను కలవాలని ఆశించాడు. దీంతో జూన్ 17న పవన్ కళ్యాణ్ స్వయంగా హనుమకొండలోని నిరంజన్ ఇంటికి వెళ్లి పరామర్శించి, ఆర్థిక సహాయంతో పాటు ఒక పప్పీ మరియు ఐప్యాడ్‌ను బహుమతిగా ఇచ్చారు. ఈ సంఘటన అప్పట్లో సోషల్ మీడియా వేదికగా విపరీతంగా ఆకట్టుకుంది. ఇదిలా ఉండగా, ఈ సున్నితమైన అంశాన్ని వైఎస్‌ఆర్‌సీపీ నాయకుడు పేర్ని నాని రాజకీయంగా విమర్శిస్తూ పవన్ కళ్యాణ్ రాజకీయ లాభం కోసమే ఇదంతా చేశాడని వ్యాఖ్యానించారు. ఈ వీడియోలను చూసిన నిరంజన్ తీవ్ర మానసిక వేదనకు గురై భోజనం చేయడం మానేశాడని, ఫలితంగానే అతని ఆరోగ్యం క్షీణించి మరణించాడని తండ్రి కన్నీరుమున్నీరయ్యారు. ఈ నేపథ్యంలో నిరంజన్ తండ్రి మీడియా ముందుకు వచ్చి "పవన్ అన్న మా బాబును బతికిస్తే, పేర్ని నాని చంపేశాడు" అంటూ తీవ్ర ఆరోపణలు చేశారు. నాయకులు మాట్లాడేటప్పుడు పిల్లల మనస్తత్వాలను కూడా దృష్టిలో ఉంచుకోవాలని, రాజకీయాలు ఇంత దిగజారిపోకూడదని ఆయన హితవు పలికారు. ప్రస్తుతం ఈ ఘటన రెండు రాష్ట్రాల రాజకీయ వర్గాల్లో మానవత్వం వర్సెస్ రాజకీయాలు అనే పెద్ద చర్చకు దారితీసింది. నిరంజన్ మృతికి సంతాపంగా సంగీత దర్శకుడు థమన్ తన ఓజీ 2 ఆల్బమ్‌ను ఆ బాలుడికి అంకితం ఇవ్వడం విశేషం. చిన్నపిల్లాడి ప్రాణాల కంటే రాజకీయం ముఖ్యం కాదని, నాయకులు తమ విమర్శల్లో హద్దులు దాటకూడదని ప్రజలు అభిప్రాయపడుతున్నారు. నిరంజన్ పట్ల సోషల్ మీడియాలో భారీగా సానుభూతి వ్యక్తమవుతుండగా, అతని ఆత్మకు శాంతి చేకూరాలని అందరూ ప్రార్థిస్తున్నారు.