బాలినేని వర్సెస్ దామచర్ల మాటల పోరుకు అధిష్ఠానం బ్రేకులు..!

ప్రకాశం జిల్లా ఒంగోలు నియోజకవర్గంలో కూటమి భాగస్వామ్య పార్టీల నేతల మధ్య రాజకీయ వివాదం తీవ్రరూపం దాల్చింది. జనసేన నేత, మాజీ మంత్రి బాలినేని శ్రీనివాసరెడ్డి, టీడీపీ ఎమ్మెల్యే దామచర్ల జనార్ధన్ పరస్పరం విమర్శలు గుప్పించుకోవడంతో రాజకీయం వేడెక్కింది. ఈ క్రమంలో కూటమి సమన్వయ కమిటీ రంగంలోకి దిగి ఇద్దరు నేతలకు స్పష్టమైన ఆదేశాలు జారీ చేసింది. ఇద్దరూ సంయమనం పాటించాలని, బహిరంగ విమర్శలు మానాలని సీరియస్ గా హెచ్చరించింది. బాలినేని శ్రీనివాసరెడ్డి, దామచర్ల జనార్ధన్ మధ్య ఒంగోలు రాజకీయాల్లో దశాబ్దాలుగా తీవ్రమైన వైరం నడుస్తోంది. గతంలో కాంగ్రెస్, వైసీపీలలో పనిచేసిన బాలినేని 2024 ఎన్నికల్లో దామచర్ల చేతిలో ఓటమి పాలయ్యారు. ఆ తర్వాత ఆయన జనసేన పార్టీలో చేరి కూటమిలో భాగమయ్యారు. అయినప్పటికీ స్థానికంగా ఉద్రిక్తతలు సమసిపోలేదు. జనసేన అధికారంలో ఉన్నా తమకు తగిన అధికారాలు లేవని బాలినేని చేసిన వ్యాఖ్యలు కూటమి వర్గాల్లో పెద్ద చర్చకు దారితీశాయి. ఇదిలా ఉండగా ఇటీవల బాలినేని మీడియా ముందుకు వచ్చి దామచర్ల జనార్ధన్ పై తీవ్రమైన అవినీతి ఆరోపణలు చేశారు. ఇసుక, మద్యం, సెటిల్మెంట్లు, రేషన్ దందాల్లో ఎమ్మెల్యేకు నెలవారీ మామూళ్లు అందుతున్నాయని విమర్శించారు. కార్పొరేషన్ నిధుల మాయం, భూక్రమణల అంశాలను కూడా లేవనెత్తారు. దీంతో ఆగ్రహం చెందిన దామచర్ల కూడా గట్టిగానే కౌంటర్ ఇచ్చారు. బాలినేని వైసీపీ హయాంలో చేసిన అక్రమాలపై పెద్ద పుస్తకమే రాయవచ్చని ఆయన మండిపడ్డారు. ఫలితంగా ఇద్దరి మధ్య మాటల యుద్ధం రోజురోజుకు ముదరడంతో టీడీపీ, జనసేన అధిష్ఠానాలు ఈ అంశాన్ని తీవ్రంగా పరిగణించాయి. ఈ నేపథ్యంలో కూటమి సమన్వయ కమిటీ నేతలు వెంటనే టెలికాన్ఫరెన్స్ నిర్వహించి ఇద్దరితో మాట్లాడారు. వ్యక్తిగత విమర్శలు చేసుకొని ఎన్డీయే కూటమికి నష్టం కలిగించవద్దని హెచ్చరించారు. మంత్రి అచ్చెన్నాయుడు దామచర్లతో మాట్లాడగా, జనసేన అగ్రనేతలు బాలినేనికి సంయమనం పాటించాలని సూచించారు. కూటమి పెద్దల జోక్యంతో ఇద్దరు నేతలు ప్రస్తుతానికి మీడియా ముందుకు వచ్చి విమర్శలు చేయకుండా బ్రేకులు పడ్డాయి. ఏదైనా అసంతృప్తి ఉంటే పార్టీ అధిష్ఠానం దృష్టికి మాత్రమే తీసుకెళ్లాలని కమిటీ స్పష్టం చేసింది. స్థానికంగా ఉన్న వివాదాలను రచ్చకెక్కించడం వల్ల కార్యకర్తల్లో గందరగోళం నెలకొంటుందని పార్టీలు భావించాయి. దీంతో ఇరు వర్గాల నేతలు వెనక్కి తగ్గక తప్పని పరిస్థితి ఏర్పడింది. రాబోయే రోజుల్లో వీరిద్దరూ వ్యక్తిగత విభేదాలు పక్కన పెట్టి కలసి పనిచేస్తేనే ఒంగోలులో కూటమి బలంగా ముందుకు సాగుతుంది. లేకపోతే స్థానికంగా రాజకీయ కుంపటి నిత్యం రగులుతూనే ఉంటుందని కార్యకర్తలు భావిస్తున్నారు. అధిష్ఠానం హెచ్చరికల తర్వాత ఈ వివాదం పూర్తిగా సమసిపోతుందో లేదో వేచి చూడాలి. సమన్వయ కమిటీ నిర్ణయంతో ప్రస్తుతానికి ఒంగోలు రాజకీయం కాస్త చల్లబడింది.