వరుసగా 100 కోట్ల సినిమాలు.. సౌత్ గోల్డెన్ గర్ల్ మమితా!

దక్షిణాది చిత్ర పరిశ్రమలో ఇప్పుడు ఎక్కడ చూసినా ఒకే పేరు మార్మోగిపోతోంది. ఆమె మమితా బైజు. ఒకప్పుడు సాధారణ పాత్రలు చేసిన ఈ నటి, ఇప్పుడు వరుసగా 100 కోట్ల వసూళ్లను సాధిస్తూ సౌత్ ఇండస్ట్రీకి కొత్త గోల్డెన్ గర్ల్ గా మారింది. ప్రతి సినిమాతోనూ బాక్సాఫీస్ వద్ద తనదైన ముద్ర వేస్తూ, నిర్మాతల మోస్ట్ వాంటెడ్ హీరోయిన్ గా గుర్తింపు తెచ్చుకుంటోంది. ఆమె నటనతో పాటు గ్లామర్ కూడా తోడవ్వడంతో ప్రేక్షకులు బ్రహ్మరథం పడుతున్నారు. కెరీర్ ప్రారంభంలో మలయాళంలో చైల్డ్ ఆర్టిస్ట్ గా మరియు కొన్ని చిన్న క్యారెక్టర్ రోల్స్ లో మమితా నటించింది. ఆ సమయంలో ఆమెకు పెద్దగా గుర్తింపు రాలేదు. అయితే 2024 లో వచ్చిన ప్రేమలు సినిమా ఆమె జాతకాన్ని పూర్తిగా మార్చేసింది. మలయాళంతో పాటు తెలుగు, తమిళ భాషల్లో ఈ సినిమా భారీ విజయం సాధించింది. ప్రపంచవ్యాప్తంగా 100 కోట్ల రూపాయల గ్రాస్ వసూలు చేసి, ఆమెను రాత్రికి రాత్రే స్టార్ హీరోయిన్ గా మార్చేసింది. ఈ విజయం తర్వాత ఆమె వెనుదిరిగి చూడాల్సిన అవసరం రాలేదు. ప్రదీప్ రంగనాథన్ తో కలసి చేసిన డ్యూడ్ సినిమా కూడా బాక్సాఫీస్ వద్ద 100 కోట్ల రూపాయల మార్క్ దాటింది. దీంతో ఈ భామ క్రేజ్ ఒక్కసారిగా ఆకాశాన్ని తాకింది. ఇదిలా ఉండగా, జులై 2026 లో విజయ్ చివరి చిత్రం జన నాయగన్ లో పెంపుడు కూతురిగా కీలక పాత్ర పోషించింది. ఈ సినిమాకు వచ్చిన టాక్ తో సంబంధం లేకుండా ప్రపంచవ్యాప్తంగా దాదాపు 300 కోట్ల రూపాయలు వసూలు చేసి రికార్డు సృష్టించింది. ఇక ఆగస్టు 14 న సూర్య సరసన వచ్చిన విశ్వనాథ్ అండ్ సన్స్ చిత్రంలోనూ మమితా తన అద్భుత నటనతో ఆకట్టుకుంది. ఈ సినిమా 200 కోట్ల రూపాయల బ్లాక్ బస్టర్ విజయాన్ని అందుకోవడమే కాకుండా, తన నటనతో స్టార్ హీరో సూర్యను కూడా డామినేట్ చేసిందనే ప్రశంసలు దక్కించుకుంది. ఫలితంగా, ఆమెకు వరుస భారీ ఆఫర్లు క్యూ కడుతున్నాయి. పెద్ద హీరోలు కూడా ఆమెతో నటించేందుకు ఆసక్తి చూపిస్తున్నారు. ప్రస్తుతం ఆగస్టు 21 న ఓనం కానుకగా విడుదలైన బెత్లెహెమ్ కుటుంబ యూనిట్ చిత్రంలో నివిన్ పౌలీతో కలసి నటించింది. గిరీష్ ఏడి దర్శకత్వం వహించిన ఈ సినిమా కేవలం 6 రోజుల్లోనే 100 కోట్ల మార్క్ దాటేసింది. ఈ నేపథ్యంలో ఈ చిత్రం సులభంగా 200 కోట్ల దిశగా దూసుకుపోతోందని ట్రేడ్ వర్గాలు అంచనా వేస్తున్నాయి. ఈ సినిమా తెలుగు వెర్షన్ ను సెప్టెంబర్ 4 న విడుదల చేయడానికి నిర్వాహకులు సన్నాహాలు చేస్తున్నారు.