విశాఖలో భారీ హైపర్‌స్కేల్ డేటా సెంటర్ స్థాపనకు లోకేష్ అభ్యర్థన.!

విశాఖపట్నం నగరాన్ని అంతర్జాతీయ స్థాయి వైజాగ్ AI హబ్ నగరంగా తీర్చిదిద్దేందుకు ఆంధ్రప్రదేశ్ ఐటీ శాఖ మంత్రి నారా లోకేష్ సరికొత్త వ్యూహాలతో ముందుకు సాగుతున్నారు. ఇందులో భాగంగానే ఇటీవల ముంబై నగరంలో ఎయిర్‌ట్రంక్ సంస్థ చీఫ్ ఎగ్జిక్యూటివ్ ఆఫీసర్ రాబిన్ ఖుదాతో లోకేష్ సుదీర్ఘంగా సమావేశమయ్యారు. ఈ చర్చల్లో భాగంగా వైజాగ్‌లో ఒక హైపర్‌స్కేల్ డేటా సెంటర్ ఫ్యూచర్ క్యాంపస్‌ను ఏర్పాటు చేయాలని ఆయన అభ్యర్థించారు. ఆంధ్రప్రదేశ్ రాష్ట్రాన్ని AI హైపర్‌స్కేల్ ఇన్‌ఫ్రాస్ట్రక్చర్ హబ్‌గా మార్చాలనేది తమ ప్రభుత్వ ప్రధాన ఉద్దేశమని ఈ సందర్భంగా లోకేష్ స్పష్టం చేశారు. ముంబై వేదికగా జరిగిన ఈ అత్యున్నత స్థాయి చర్చల్లో రాష్ట్రంలో పెట్టుబడులు, విస్తరణ, తదుపరి దశ అభివృద్ధిపై ప్రధానంగా ఫోకస్ పెట్టారు. ఇదిలా ఉండగా చంద్రబాబు నాయుడు నేతృత్వంలోని రాష్ట్ర ప్రభుత్వం టెక్నాలజీ, ఆర్టిఫిషియల్ ఇంటెలిజెన్స్ లాంటి సన్‌రైజ్ సెక్టార్లపై ప్రత్యేకంగా దృష్టి సారించింది. ఈ క్రమంలోనే విశాఖపట్నం వేదికగా భారీ ప్రాజెక్టుల పురోగతి వేగంగా ముందుకు కదులుతోంది. వైజాగ్‌లో గూగుల్ ప్రతిష్టాత్మకంగా ఏర్పాటు చేస్తున్న ప్రాజెక్టు కోసం ఏకంగా 15 బిలియన్ డాలర్లు అంటే సుమారు 1.35 లక్షల కోట్ల రూపాయల భారీ పెట్టుబడి పెట్టనున్నారు. ఈ పెట్టుబడుల ద్వారా వైజాగ్‌లో ఆసియా ఖండంలోనే అతిపెద్దదైన 1 గిగావాట్ స్కేల్ AI డేటా సెంటర్ ఏర్పాటు కానుంది. దీనికి సంబంధించిన గ్రౌండ్ బ్రేకింగ్ పనులు 2026 ఏప్రిల్ 28 వ తేదీన విజయవంతంగా పూర్తయ్యాయి. ఈ భారీ ప్రాజెక్టు కోసం ప్రముఖ సంస్థలైన అదానీకనెక్స్, ఎయిర్‌టెల్ నెక్ స్ట్రా భాగస్వామ్యం వహిస్తున్నాయి. దీంతో రాష్ట్రంలో సుమారు 2 లక్షల ఉద్యోగాల కల్పన జరగడమే కాకుండా, ఆంధ్రప్రదేశ్ రాష్ట్ర జీఎస్డీపీ వృద్ధికి కూడా భారీగా బూస్ట్ లభించనుంది. మరోవైపు రిలయన్స్ సంస్థ కూడా వైజాగ్‌లో 1 గిగావాట్ సామర్థ్యం కలిగిన AI డేటా సెంటర్‌ను ఏర్పాటు చేస్తోంది. ఈ నేపథ్యంలోనే 2029 సంవత్సరం నాటికి రాష్ట్రవ్యాప్తంగా మొత్తం 6 గిగావాట్ డేటా సెంటర్ కెపాసిటీని అందుకోవాలని ఆంధ్రప్రదేశ్ ప్రభుత్వం ఒక పెద్ద టార్గెట్‌గా పెట్టుకుంది. గూగుల్ చేపట్టిన భారీ ప్రాజెక్టులో అదానీకనెక్స్ సంస్థ కీలక భాగస్వామిగా ఉంటూ అవసరమైన ఇన్‌ఫ్రాస్ట్రక్చర్‌ను అందిస్తోంది. ఫలితంగా గ్లోబల్ టెక్ రంగంలో వైజాగ్ AI హబ్ పేరు ప్రముఖంగా వినిపిస్తోంది. ప్రస్తుతం ఎయిర్‌ట్రంక్ సంస్థ భారతదేశంలో తన మొదటి డేటా సెంటర్లను విస్తరిస్తున్న తరుణంలో లోకేష్ గారు వైజాగ్‌ను ప్రత్యేకంగా ప్రతిపాదించారు. ఆంధ్రప్రదేశ్ రాష్ట్రాన్ని కేవలం డేటా సెంటర్లకు ఆతిథ్యం ఇచ్చే ప్రాంతంగానే కాకుండా, పూర్తి స్థాయి AI ఇన్‌ఫ్రా మాన్యుఫాక్చరింగ్ హబ్‌గా మార్చాలనేది లోకేష్ దృక్పథం. స్పీడ్ ఆఫ్ డూయింగ్ బిజినెస్ విధానం ద్వారా గ్లోబల్ పెట్టుబడులను రాష్ట్ర ప్రభుత్వం ఆకర్షిస్తోంది. రాబోయే రోజుల్లో వైజాగ్ AI హబ్ గ్లోబల్ టెక్నాలజీ రంగంలో అత్యంత కీలకమైన కేంద్రంగా మారుతుందని ఐటీ శాఖ గట్టి నమ్మకంతో ఉంది.