కేటీఆర్ పాదయాత్ర పోస్ట్‌పోన్‌.. 2027కి వాయిదా..!

తెలంగాణ రాజకీయాల్లో ఇప్పుడు కేటీఆర్ పాదయాత్ర అంశం తీవ్ర చర్చనీయాంశంగా మారింది. భారత రాష్ట్ర సమితి శ్రేణులు ఎంతో ఉత్కంఠగా ఎదురుచూస్తున్న ఈ యాత్రలు ప్రస్తుతానికి వాయిదా పడినట్లు తెలుస్తోంది. బీఆర్ఎస్ వర్కింగ్ ప్రెసిడెంట్ కేటీఆర్ పాదయాత్రతో పాటు కేసీఆర్ బస్సు యాత్ర కూడా వాయిదా పడ్డాయి. ప్రస్తుతం రాష్ట్రంలో ఉన్న రాజకీయ పరిస్థితుల నేపథ్యంలోనే ఈ కీలక నిర్ణయం తీసుకున్నట్లు సమాచారం. వాస్తవానికి తెలంగాణలో మూడోసారి అధికారంలోకి రావడమే లక్ష్యంగా బీఆర్ఎస్ పార్టీ ఈ ఏడాది నుంచే ప్రజల్లోకి వెళ్లాలని భావించింది. ఇందులో భాగంగానే కేటీఆర్ రాష్ట్రవ్యాప్త పాదయాత్రకు అన్ని ఏర్పాట్లు చేసుకోవాలని పార్టీ శ్రేణులకు దిశానిర్దేశం చేశారు. కేసీఆర్ సైతం బస్సు యాత్ర ద్వారా జిల్లాలను చుట్టేయాలని ప్రణాళికలు సిద్ధం చేసుకున్నారు. పార్టీని క్షేత్రస్థాయిలో బలోపేతం చేయడంతో పాటు ప్రజలకు మరింత చేరువ కావడమే ఈ యాత్రల ప్రధాన ఉద్దేశంగా భావించారు. దీంతో ఈ ఏడాది నుంచే యాత్రలు ప్రారంభం అవుతాయని గులాబీ శ్రేణులు ఆశించాయి. ఇదిలా ఉండగా ప్రస్తుతం తెలంగాణలో కాంగ్రెస్ ప్రభుత్వంపై ప్రజల్లో ఆశించిన స్థాయిలో వ్యతిరేకత కనిపించడం లేదు. ముఖ్యంగా ముఖ్యమంత్రి రేవంత్ రెడ్డి తీసుకుంటున్న నిర్ణయాలు మరియు ప్రభుత్వ వాదనల పట్ల ప్రజలు సానుకూలంగా స్పందిస్తున్నట్లు తెలుస్తోంది. ఇప్పట్లో సర్కారుపై పెద్దగా ప్రజల్లో మొహం మొత్తకపోవడంతో ఇప్పుడు యాత్రలు చేపట్టినా ఆశించిన ఫలితం ఉండదనే భావన వ్యక్తమవుతోంది. ఫలితంగా ప్రస్తుత పరిస్థితులు అనుకూలంగా లేవనే ఉద్దేశంతో యాత్రలను వాయిదా వేయడమే మంచిదని గులాబీ అధిష్టానం భావించినట్లు సమాచారం. ఈ నేపథ్యంలోనే కేటీఆర్ పాదయాత్రతో పాటు కేసీఆర్ బస్సు యాత్రను కూడా వచ్చే ఏడాదికి అంటే 2027 సంవత్సరానికి వాయిదా వేసినట్లు రాజకీయ వర్గాల్లో ప్రచారం జరుగుతోంది. సాధారణంగా ప్రభుత్వంపై ప్రజా వ్యతిరేకత తీవ్రంగా ఉన్నప్పుడు యాత్రలు చేస్తే మైలేజ్ వస్తుందని కానీ ఇప్పుడు అలాంటి వాతావరణం లేకపోవడం వల్లే వెనక్కి తగ్గారని అంటున్నారు.