రాజకీయ ఆరంగేట్రం వార్తలను ఖండించిన జూనియర్ ఎన్టీఆర్..

టాలీవుడ్ స్టార్ హీరో జూనియర్ ఎన్టీఆర్ రాజకీయ ప్రవేశంపై గత కొన్ని రోజులుగా జరుగుతున్న ప్రచారానికి ఆయన కార్యాలయం చెక్ పెట్టింది. జూనియర్ ఎన్టీఆర్ రాజకీయాల్లోకి వస్తున్నారంటూ వస్తున్న వార్తలను ఆయన అధికారిక బృందం తీవ్రంగా ఖండించింది. ముఖ్యంగా రావ్ ఎన్టీఆర్ అనే సంస్థతో తమకు ఎలాంటి సంబంధం లేదని స్పష్టం చేస్తూ ఒక అధికారిక ప్రకటనను విడుదల చేసింది. ఈ ప్రకటనతో ఎన్టీఆర్ రాజకీయ ఎంట్రీపై జరుగుతున్న ఊహాగానాలకు తాత్కాలికంగా తెరపడినట్లయింది. గత కొద్ది రోజులుగా సోషల్ మీడియా వేదికగా జూనియర్ ఎన్టీఆర్ పేరుతో కొన్ని సంస్థలు కార్యక్రమాలు నిర్వహిస్తున్నాయి. ఇందులో భాగంగానే రావ్ ఎన్టీఆర్ అనే సంస్థ జూలై 18 తేదీన తిరుపతిలో ఒక భారీ సమావేశాన్ని ఏర్పాటు చేస్తున్నట్లు ప్రకటించింది. ఊరు వాడ అనే పేరుతో గ్రామ స్థాయి సేవా కార్యక్రమాలను నిర్వహిస్తామని సదరు సంస్థ ప్రచారం చేసింది. ఈ ప్రచారం కాస్తా జోరందుకోవడంతో అభిమానుల్లో తీవ్ర గందరగోళం నెలకొంది. దీంతో రంగంలోకి దిగిన జూనియర్ ఎన్టీఆర్ కార్యాలయం ఈ వ్యవహారంపై సుదీర్ఘ వివరణ ఇస్తూ ప్రకటన విడుదల చేసింది. ఇదిలా ఉండగా రావ్ ఎన్టీఆర్ అనే సంస్థకు ఎన్టీఆర్‌కు గానీ ఆయన అధికారిక బృందానికి గానీ ఎలాంటి సంబంధం లేదని తేల్చి చెప్పారు. ఎన్టీఆర్ పేరును వాడుకుంటూ ప్రకటనలు చేయడానికి లేదా కార్యక్రమాలు నిర్వహించడానికి ఆ సంస్థకు ఎలాంటి హక్కులు లేవని ఈ సందర్భంగా గట్టిగా హెచ్చరించారు. ఫలితంగా అనాధికారిక సంస్థలు చేసే ఎలాంటి ప్రచారాలను కూడా అభిమానులు, మీడియా నమ్మవద్దని ఎన్టీఆర్ టీమ్ కోరింది. ఈ నేపథ్యంలో జూనియర్ ఎన్టీఆర్ స్వయంగా చేపట్టే సేవా కార్యక్రమాలు లేదా ఇతర అధికారిక ప్రకటనలు ఏవైనా ఉంటే అవి నేరుగా ఆయన కార్యాలయం నుంచే వస్తాయని స్పష్టం చేశారు. అనుమతి లేకుండా ఎన్టీఆర్ పేరును వాడుకుంటే చట్టపరమైన చర్యలు ఉంటాయనే సంకేతాలను కూడా ఇచ్చారు. ఈ గందరగోళానికి ముగింపు పలకడానికే తాము ఈ చివరి స్పష్టీకరణ ఇస్తున్నట్లు ఎన్టీఆర్ కార్యాలయం తన ప్రకటనలో పేర్కొంది. ఎన్టీఆర్ ఇమేజ్‌ను దెబ్బతీసేలా లేదా అభిమానులను తప్పుదోవ పట్టించేలా ప్రచారం చేసే సంస్థల పట్ల అప్రమత్తంగా ఉండాలని సూచించింది. భవిష్యత్తులో ఇలాంటి అనాధికారిక సమావేశాలకు దూరంగా ఉండాలని అభిమానులను కోరింది.