వరల్డ్‌కప్‌ కోసం గంభీర్–గిల్ మాస్టర్ ప్లాన్!

2027 ఐసీసీ పురుషుల వన్డే ప్రపంచకప్ టోర్నీని లక్ష్యంగా చేసుకుని భారత క్రికెట్ జట్టు యాజమాన్యం ఇప్పటినుంచే ముందస్తు ప్రణాళికలు రచిస్తోంది. దక్షిణాఫ్రికా, జింబాబ్వే, నమీబియా సంయుక్తంగా ఆతిథ్యమివ్వనున్న ఈ మెగా టోర్నీకి ముందు అక్కడ ప్రత్యేకంగా వన్డే సిరీస్ ఆడాలని టీమిండియా హెడ్ కోచ్ గౌతమ్ గంభీర్, వన్డే కెప్టెన్ శుభ్‌మన్ గిల్ బీసీసీఐని కోరారు. టోర్నీకి సరిగ్గా ముందే సౌతాఫ్రికా గడ్డపై ప్రాక్టీస్ లభిస్తే అక్కడి మైదానాలు, పిచ్ పరిస్థితులపై స్పష్టమైన అవగాహన వస్తుందని వారు భావిస్తున్నారు. 2027 అక్టోబర్, నవంబర్ నెలల్లో వన్డే ప్రపంచకప్ జరగాల్సి ఉంది. సాధారణంగా మెగా టోర్నీలు ప్రారంభమయ్యే సమయానికి ఆకస్మికంగా అక్కడికి వెళ్లి ఆడటం వల్ల ఆటగాళ్లకు మైదాన వాతావరణం అలవాటు పడటానికి సమయం పడుతుంది. అందుకే టోర్నీ ఆరంభానికి ముందే అక్కడి మైదానాల్లో నేరుగా మ్యాచ్‌లు ఆడాలని టీమిండియా మేనేజ్‌మెంట్ నిశ్చయించుకుంది. ఐపీఎల్ 2027 పూర్తయిన తర్వాత భారత జట్టు ఫ్యూచర్ టూర్స్ ప్రోగ్రామ్‌లో తగినంత వ్యవధి ఖాళీగా ఉంది. దీంతో ఆ సమయాన్ని సద్వినియోగం చేసుకుంటూ దక్షిణాఫ్రికాలో 4 నుండి 6 వన్డే మ్యాచ్‌ల సిరీస్ నిర్వహించాలని గంభీర్, గిల్ బీసీసీఐ ముందు ప్రతిపాదించారు. భారత జట్టు మేనేజ్‌మెంట్ చేసిన ఈ విజ్ఞప్తిపై స్పందించిన బీసీసీఐ ఇప్పటికే క్రికెట్ సౌతాఫ్రికా బోర్డుతో చర్చలు ప్రారంభించింది. ఇదిలా ఉండగా, ఇరు దేశాల క్రికెట్ బోర్డులు ఈ ప్రత్యేక సిరీస్‌కు అంగీకరిస్తే ఐపీఎల్ ముగిసిన వెంటనే భారత ఆటగాళ్లు దక్షిణాఫ్రికా పర్యటనకు వెళ్లేందుకు మార్గం సుగమమవుతుంది. ఫలితంగా మెగా టోర్నీకి ముందు ఆటగాళ్లకు అవసరమైన మ్యాచ్ ప్రాక్టీస్ లభించడంతో పాటు జట్టు కలయికలను పరీక్షించుకునే అవకాశం లభిస్తుంది. ఈ నేపథ్యంలో కేవలం మ్యాచ్ ప్రాక్టీస్ మాత్రమే కాకుండా ఆటగాళ్ల ఫిట్‌నెస్‌పై కూడా యాజమాన్యం ప్రత్యేక దృష్టి సారించింది. జట్టు స్ట్రెంత్ అండ్ కండిషనింగ్ కోచ్ ఆడ్రియన్ లే రూక్స్ రూపొందించిన ఫిట్‌నెస్ ప్రణాళికలపై బీసీసీఐ సమీక్ష నిర్వహించింది. ఈ సమీక్షా సమావేశంలో కెప్టెన్ శుభ్‌మన్ గిల్ కూడా పాల్గొని తన అమూల్యమైన సూచనలను అందించారు. ముఖ్యంగా పరిమిత ఓవర్ల క్రికెట్‌లో కీలక ఆటగాళ్లైన జస్‌ప్రీత్ బుమ్రా, హార్దిక్ పాండ్యా ఫిట్‌నెస్‌పై ప్రత్యేక శ్రద్ధ వహించాలని నిర్ణయించారు. వరల్డ్ కప్ నాటికి కీలక బౌలర్లు, ఆల్ రౌండర్లు సంపూర్ణ ఆరోగ్యంతో ఉండేలా వారి వర్క్‌లోడ్‌ను నిర్వహించనున్నారు. ప్రస్తుతానికి ఈ సిరీస్ సంబంధించి ఇరు బోర్డుల మధ్య ప్రాథమిక చర్చలు మాత్రమే జరుగుతున్నాయి. అంతర్జాతీయ క్రికెట్ మండలి క్యాలెండర్, ప్రసార హక్కులు, ఆటగాళ్ల ప్రయాణ ప్రణాళికలను పరిశీలించిన తర్వాత బీసీసీఐ దీనిపై అధికారిక ప్రకటన చేసే అవకాశముంది.