తెలుగు రాష్ట్రాలకు భారీ వర్ష ముప్పు.. 13 జిల్లాలకు ఎల్లో అలర్ట్!

ఆంధ్రప్రదేశ్ మరియు తెలంగాణ రాష్ట్రాల్లో రానున్న రోజుల్లో వర్షాలు కురిసే అవకాశం ఉందని భారత వాతావరణ శాఖ అధికారులు ప్రకటించారు. మధ్యప్రదేశ్ పరిసర ప్రాంతాలలో కొనసాగుతున్న తీవ్ర అల్పపీడన ప్రభావం కారణంగానే తెలుగు రాష్ట్రాల్లో ఈ వర్షాలు పడతాయని తెలిపారు. ప్రజలు అప్రమత్తంగా ఉండాలని వాతావరణ శాఖ తీవ్ర హెచ్చరిక జారీ చేసింది. తెలంగాణలోని హైదరాబాద్, జగిత్యాల, కామారెడ్డి సహా అనేక జిల్లాల్లో ఉరుములు మరియు మెరుపులతో కూడిన భారీ జల్లులు కురిసే అవకాశం ఉందాని వెల్లడించారు. ఇప్పటికే కొన్ని ప్రాంతాల్లో వాతావరణం వేగంగా మారిపోయింది. దీంతో రానున్న రోజుల్లో తెలంగాణలో సాధారణం కంటే ఎక్కువ వర్షపాతం నమోదయ్యే అవకాశం ఉందని అధికారులు చెబుతున్నారు. ఈ పరిస్థితి ఇలా ఉండగా ఆంధ్రప్రదేశ్ ప్రాంతానికి కూడా భారీ వర్ష సూచన జారీ అయింది. ముఖ్యంగా కోస్తాంధ్ర మరియు రాయలసీమ ప్రాంతాల్లో సెప్టెంబర్ 3వ తేదీ నుంచి 5వ తేదీ వరకు భారీగా వర్షాలు కురుస్తాయి. ఈ నేపథ్యంలో ప్రజలు తగిన జాగ్రత్తలు తీసుకోవాలని అధికారులు సూచనలు చేస్తున్నారు. రైతులు మరియు తీరప్రాంత ప్రజలను ప్రభుత్వం అప్రమత్తం చేసింది. ఫలితంగా సెప్టెంబర్ 3, 4 తేదీల్లో మత్స్యకారులు ఎవరూ కూడా బంగాళాఖాతంలోకి వేటకు వెళ్లకూడదని అధికారులు కఠినమైన ఆదేశాలు జారీ చేశారు. వర్షాలతో పాటు బలమైన ఈదురు గాలులు కూడా వీచే ప్రమాదం ఉందని వెల్లడించారు. బలమైన గాలులు వీచే అవకాశం ఉన్నందున ప్రజలు అత్యంత జాగ్రత్తగా ఉండాలని నిపుణులు సూచిస్తున్నారు. బయట ఉన్న సమయాల్లో విద్యుత్ స్తంభాలు, భారీ హోర్డింగ్‌లు మరియు పాత చెట్ల కింద నిలబడకూడదని స్పష్టం చేశారు. విద్యుత్ ప్రమాదాలు జరిగే అవకాశం ఉంది కాబట్టి జాగ్రత్తగా ఉండాలని హెచ్చరిస్తున్నారు. వాతావరణ శాఖ సూచనల ప్రకారం మొత్తం 13 జిల్లాలకు ఎల్లో అలర్ట్ జారీ చేయడం జరిగింది. వాతావరణంలో వచ్చే మార్పులను నిరంతరం గమనిస్తూ ఉండాలని అధికారులు సూచిస్తున్నారు. అత్యవసర పరిస్థితి ఉంటే తప్ప ప్రజలు బయటకు రాకపోవడమే మంచిదని అధికారులు స్పష్టం చేశారు.