సీఎం రేవంత్ వైఫల్యమే కారణం - హరీష్..!

రంగారెడ్డి జిల్లా షాబాద్ లో జరిగిన ఆరుగురి సామూహిక హత్యల ఉదంతం తెలంగాణ రాజకీయాల్లో తీవ్ర కలకలం రేపుతోంది. ఈ దారుణ ఘటనపై బీఆర్ఎస్ సీనియర్ నేత, మాజీ మంత్రి తన్నీరు హరీశ్ రావు తీవ్రస్థాయిలో ధ్వజమెత్తారు. రాష్ట్రంలో శాంతిభద్రతలు పూర్తిగా క్షీణించాయని మండిపడ్డారు.ముఖ్యమంత్రి అనుసరిస్తున్న ప్రజా వ్యతిరేక విధానాలే కారణమని ఆయన ఆరోపించారు. ప్రభుత్వం పోలీసు వ్యవస్థను కేవలం రాజకీయ అవసరాల కోసం వాడుకుంటోందని ఆవేదన వ్యక్తం చేశారు. సీఎం రేవంత్ రెడ్డి పరిపాలనా వైఫల్యం వల్లే ఈ ఘోరం జరిగిందని విమర్శించారు. ఇదిలా ఉండగా ఈ ఘోరానికి ఒడిగట్టిన ప్రధాన నిందితుడు రాజ్ కుమార్ అలియాస్ రాజు కుమార్ ఆరుగురిని పొట్టనబెట్టుకున్నాడు. ఆ తర్వాత అతడు కూడా కొల్కతా సమీపంలో విషం తాగి ఆత్మహత్య చేసుకున్నట్లు సమాచారం అందింది. గత కొంతకాలంగా అధికార కాంగ్రెస్, ప్రతిపక్ష బీఆర్ఎస్ పార్టీల మధ్య రాజకీయ ఉద్రిక్తతలు తీవ్రస్థాయిలో కొనసాగుతున్నాయి. ముఖ్యంగా కాళేశ్వరం ప్రాజెక్టు వివాదంతో పాటు పలు అంశాలపై ఇరు పార్టీల నాయకులు పరస్పరం తీవ్ర విమర్శలు చేసుకుంటున్నారు. ఈ తరుణంలోనే షాబాద్ లో జరిగిన దారుణ హత్యల ఉదంతం రాజకీయంగా మరింత వేడిని రగిల్చింది. ఈ నేపథ్యంలో హరీశ్ రావు అధికార యంత్రాంగంపై తీవ్రమైన ఆరోపణలు గుప్పించారు. గతంలో సదరు నిందితుడిపై ఉన్న ఒక పోక్సో కేసు నుంచి తప్పించేందుకు రేవంత్ రెడ్డి అనుచరుడు ప్రయత్నించాడని ఆరోపించారు. ఇందుకోసం పోలీసులకు రూ.20 లక్షల వరకు లంచం ఇచ్చి నిందితుడిని కాపాడారని సంచలన వ్యాఖ్యలు చేశారు. దీంతో పోలీసులు సకాలంలో స్పందించకుండా ఏకంగా 45 రోజుల పాటు నిందితుడి అరెస్టును ఆలస్యం చేశారని ధ్వజమెత్తారు. ఫలితంగా నిందితుడికి సులభంగా బెయిల్ లభించిందని, ఆ తర్వాతే అతడు ఈ దారుణ హత్యలకు తెగబడ్డాడని హరీశ్ రావు వివరించారు. ఇలాంటి ఘోర నేరస్తులతో కలిసి పోలీసులు మద్యం సేవించారనే ఆరోపణలు రావడం అత్యంత దురదృష్టకరమని ఆయన అన్నారు. రాష్ట్రంలో శాంతిభద్రతలను కాపాడాల్సిన రక్షక భట నిలయాలు ఇప్పుడు భూముల సెటిల్మెంట్లు, రాజకీయ ప్రతీకారాలకు కేంద్రాలుగా మారాయని విమర్శించారు. ఫలితంగా రాష్ట్రంలో సామాన్య ప్రజలకు, ముఖ్యంగా ఆడపిల్లల తల్లిదండ్రులకు భద్రత కరువైందని ఆందోళన వ్యక్తం చేశారు. ప్రతిరోజూ భయం గుప్పిట్లోనే బతకాల్సిన పరిస్థితి ఏర్పడిందని ధ్వజమెత్తారు. రేవంత్ రెడ్డి పాలనలో నేరగాళ్లకు రక్షణ దొరుకుతోందని ఆరోపించారు. ఈ దారుణ ఘటనకు పూర్తి బాధ్యత వహిస్తూ ముఖ్యమంత్రి సమాధానం చెప్పాలని బీఆర్ఎస్ డిమాండ్ చేస్తోంది. పోలీసులు తమ అసలైన విధులను విస్మరించి కేవలం పాలకుల సేవలో తరిస్తున్నారని దుయ్యబట్టారు. క్షేత్రస్థాయిలో శాంతిభద్రతల పరిరక్షణను గాలికి వదిలేశారని మండిపడ్డారు. కాంగ్రెస్ ప్రభుత్వం వచ్చిన నాటి నుంచి రాష్ట్రంలో క్రైమ్ రేట్ విపరీతంగా పెరిగిపోయిందని ఆరోపించారు. ఇలాంటి పరిస్థితులు కొనసాగితే ప్రజలు తిరగబడే రోజులు దగ్గర్లోనే ఉన్నాయని హెచ్చరించారు.