పాలిటెక్నిక్ విద్యార్థుల నిరసన.. హరీశ్ రావు హౌస్ అరెస్ట్!

మాజీ మంత్రి హరీశ్ రావును పోలీసులు ఆయన కోకాపేట్ నివాసంలో హౌస్ అరెస్ట్ చేశారు. వరంగల్ జిల్లాలో పాలిటెక్నిక్ విద్యార్థులు చేపడుతున్న నిరసనకు సంఘీభావం తెలపడానికి ఆయన సిద్ధమవుతుండగా ఈ చర్యలు తీసుకున్నారు. వరంగల్ జిల్లా పాలిటెక్నిక్ విద్యార్థులు ప్రభుత్వం తీసుకొచ్చిన GO 97ను తక్షణమే రద్దు చేయాలని డిమాండ్ చేస్తూ సుదీర్ఘంగా ఆందోళనలు నిర్వహిస్తున్నారు. ప్రభుత్వం పాలిటెక్నిక్ డిప్లొమా కోర్సులను Young India Skill Universityలో కలపడానికి ప్రయత్నిస్తోందని ఆరోపిస్తూ విద్యార్థులు తీవ్ర స్థాయిలో నిరసన తెలుపుతున్నారు. దీంతో పరిస్థితి ఉద్రిక్తంగా మారకుండా చూసేందుకు పోలీసులు ముందస్తు చర్యగా కోకాపేట్‌లోని హరీశ్ రావు నివాసం వద్ద ఆంక్షలు విధించారు. ఇదిలా ఉండగా హరీశ్ రావు వరంగల్ పర్యటనకు వెళ్లకుండా పోలీసులు ఆయన ఇంటి చుట్టూ భారీగా మోహరించి బయటకు రాకుండా అడ్డుకున్నారు. ఫలితంగా కోకాపేట్ నివాసం వద్ద తీవ్ర ఉత్కంఠ వాతావరణం నెలకొంది. ఈ నేపథ్యంలో ప్రభుత్వం విద్యాసంస్థల నిర్ణయాలపై కఠినంగా వ్యవహరిస్తుండటంతో విద్యార్థి సంఘాలు తమ ఆందోళనలను మరింత తీవ్రతరం చేసేందుకు సిద్ధమవుతున్నాయి. విద్యార్థుల భవిష్యత్తును దృష్టిలో ఉంచుకుని GO 97ను వెంటనే వెనక్కి తీసుకోవాలని విద్యార్థి సంఘాల నాయకులు డిమాండ్ చేస్తున్నారు. ప్రభుత్వం తమ నిర్ణయాన్ని మార్చుకోకపోతే ఆందోళనలు రాష్ట్రవ్యాప్తంగా విస్తరింపజేస్తామని హెచ్చరిస్తున్నారు.