దిల్జీత్ సత్లుజ్ సినిమాను 48 గంటల్లోనే ఎందుకు తీసేశారు?

పంజాబ్ చరిత్రలోని ఒక చీకటి అధ్యాయాన్ని తెరపైకి తీసుకొచ్చిన 'సత్లుజ్' చిత్రం తీవ్ర వివాదాలకు దారితీసింది. ప్రముఖ నటుడు దిల్జీత్ దోసాంజ్ ప్రధాన పాత్రలో నటించిన ఈ సినిమా విడుదలైన కేవలం రెండు రోజుల్లోనే భారతదేశంలో ఓటీటీ ఫ్లాట్‌ఫామ్ నుండి హఠాత్తుగా తొలగించబడింది. సెన్సార్ బోర్డు అభ్యంతరాలు, పదే పదే టైటిల్స్ మార్పులు, దశాబ్దాల క్రితం జరిగిన ఘటనల సున్నితత్వం వంటి అంశాలు ఈ సినిమాను వివాదాల సుడిగుండంలోకి నెట్టాయి. జూలై 3 న ఓటీటీలో విడుదలైన ఈ చిత్రం కేవలం 48 గంటల్లోనే మాయం కావడం సంచలనంగా మారింది. ఈ సినిమా కథ ప్రముఖ మానవ హక్కుల కార్యకర్త జస్వంత్ సింగ్ ఖల్రా జీవితం ఆధారంగా తెరకెక్కింది. దర్శకుడు హనీ త్రేహాన్ 1980, 1990 ల నాటి పంజాబ్ తీవ్రవాద కాలంలో జరిగిన పోలీసు ఎన్‌కౌంటర్లు, అదృశ్యాలు, రహస్య శవదహనాల చుట్టూ ఈ కథను మలిచారు. ఒకే జిల్లాలో వేలాది గుర్తు తెలియని శవాలను పోలీసులు దహనం చేసినట్లు ఖల్రా తన దర్యాప్తులో బయటపెట్టారు. దేశవ్యాప్తంగా సంచలనం సృష్టించిన ఈ ఘటనల తర్వాత 1995 లో ఖల్రా కూడా అదృశ్యమవ్వగా, ఆ తర్వాత పోలీసులపై కేసులు నమోదయ్యాయి. ఈ చిత్ర నిర్మాణ ప్రయాణంలో ఏకంగా మూడు సార్లు టైటిల్స్ మార్చడం గమనార్హం. మొదట సిక్కుల హత్యాకాండను సూచించేలా 'ఘల్లుఘరా' అని, తర్వాత 'పంజాబ్ 95' అని, చివరికి 'సత్లుజ్' గా పేరు మార్చారు. ఇదిలా ఉండగా, 2022 లో సెన్సార్ బోర్డు ఈ సినిమాకు సర్టిఫికేట్ ఇచ్చేందుకు ఏకంగా 127 సీన్లకు కట్స్ సూచించినట్లు వార్తలు వచ్చాయి. దీంతో థియేటర్ల విడుదల ఆలస్యమవ్వడమే కాకుండా, టొరంటో అంతర్జాతీయ ఫిల్మ్ ఫెస్టివల్‌లో కూడా దీని ప్రదర్శన రద్దయింది. చివరికి జూలై 3 న జీ5 ఓటీటీలో ఈ చిత్రం అన్‌కట్ వెర్షన్‌గా విడుదలైంది. భారతదేశంలో జీ5 కేటలాగ్ నుండి ఈ సినిమాను తొలగించినట్లు జూలై 5 న అధికారికంగా స్పష్టమైంది. ఫలితంగా అంతర్జాతీయ ప్రేక్షకులకు మాత్రమే జీ5 గ్లోబల్ ద్వారా ఈ సినిమా ప్రస్తుతం అందుబాటులో ఉంది. ప్రస్తుత పరిణామాల వల్లే భారత్‌లో స్ట్రీమింగ్ నిలిపివేసినట్లు ప్రకటించిన ఓటీటీ సంస్థ, సినిమాను తిరిగి తీసుకురావడానికి ప్రయత్నిస్తామని పేర్కొంది. ఈ నేపథ్యంలో భద్రతా కారణాల దృష్ట్యా, దేశ వ్యతిరేక శక్తులు ఈ కంటెంట్‌ను వాడుకుని పంజాబ్‌లో అస్థిరత సృష్టించవచ్చనే ఆందోళనలు వ్యక్తమవుతున్నాయి. ఈ వివాదంపై హీరో దిల్జీత్ దోసాంజ్ స్పందిస్తూ, ఇది జరుగుతుందని తనకు ముందే తెలుసని వ్యాఖ్యానించారు. ఆఫీసులు తెరిచే సోమవారం కాకుండా, ఆదివారం సాయంత్రమే డిజిటల్ ప్లాట్‌ఫామ్ నుండి సినిమాను తొలగించడంపై ఆయన ఆశ్చర్యం వ్యక్తం చేశారు. ఖల్రా జీవితానికి సంబంధించిన ఒక సీన్‌ను పంచుకుంటూ, తాను చీకటిని సవాలు చేస్తానని సోషల్ మీడియా వేదికగా ప్రకటించారు. ఈ చిత్రంలో అర్జున్ రాంపాల్, సువిందర్ విక్కీ వంటి ప్రముఖ నటులు కీలక పాత్రలు పోషించారు. ప్రస్తుతం ఈ సినిమా వివాదం దేశంలో స్వేచ్ఛా వ్యక్తీకరణ, సెన్సార్‌షిప్, చారిత్రక నిజాల చుట్టూ పెద్ద చర్చకు దారితీసింది. ఒక వర్గం వారు చరిత్రలోని నిజాలను దాచడం సరికాదని అంటుంటే, మరికొందరు శాంతిభద్రతల దృష్ట్యా ఈ నిర్ణయం సరైనదేనని సమర్థిస్తున్నారు. చారిత్రక సత్యాలను సినిమా రూపంలో చూపించేటప్పుడు ఎదురయ్యే ఉద్రిక్తతలను ఈ ఘటన మరోసారి నిరూపించింది. రాబోయే రోజుల్లో ఈ వివాదం ఎలాంటి మలుపులు తిరుగుతుందో వేచి చూడాలి.