చంద్రబాబు హిందుత్వ రాజకీయ వ్యూహం తెచ్చే దీర్ఘకాలిక ముప్పు.?

భారతీయ రాజకీయ రంగస్థలంలో సిద్ధాంతాలు, వ్యూహాలు ఎప్పుడూ ఒకే విధంగా ఉండవు. ముఖ్యంగా కాలానికి అనుగుణంగా నాయకులు తమ రాజకీయ ప్రయోజనాల కోసం కొత్త మార్గాలను ఎంచుకోవడం, తమ రాజకీయ మనుగడ కోసం పాత వైఖరిని మార్చుకోవడం తెలుగు రాజకీయాల్లో ఎప్పటి నుంచో చూస్తున్నదే. దశాబ్దాల రాజకీయ అనుభవం ఉన్న ముఖ్యమంత్రి చంద్రబాబు నాయుడు వ్యవహారశైలిలో వస్తున్న ఈ సైద్ధాంతిక మార్పులు ఇప్పుడు రాష్ట్ర రాజకీయాల్లో తీవ్ర చర్చకు దారితీస్తున్నాయి. ఒకప్పుడు లౌకిక వాదానికి పెద్దపీట వేస్తూ, జాతీయ స్థాయిలో వామపక్షాలు లేదా లౌకిక పార్టీలతో కలిసి నడిచిన చంద్రబాబు, నేడు పూర్తిగా భిన్నమైన వైఖరిని ప్రదర్శిస్తున్నారు. అమరావతి రాజధాని నిర్మాణాన్ని హిందూ ధర్మానికి సాక్ష్యంగా అభివర్ణిస్తూ, దేశంలోని పవిత్ర జలాలను, మట్టిని సేకరించి భూమిని పవిత్రం చేశామంటూ ఆయన ఆధ్యాత్మిక భావజాలాన్ని ముందుకు తీసుకురావడం వెనుక గట్టి రాజకీయ వ్యూహం ఉంది. ప్రత్యర్థులపై రాజకీయంగా పైచేయి సాధించడానికి, సమాజంలోని కొన్ని వర్గాల మద్దతును గంపగుత్తగా తమవైపు తిప్పుకోవడానికి చంద్రబాబు ఈ రకమైన సిద్ధాంతపరమైన మార్పులకు శ్రీకారం చుట్టారు. గతంలో ఏనాడూ మతపరమైన అంశాలను తన రాజకీయ ప్రయాణంలో ఇంతగా ఆయన ముడిపెట్టలేదు. కానీ మారుతున్న రాజకీయ సమీకరణాల నేపథ్యంలో, ప్రత్యర్థి పార్టీ అధినేత జగన్మోహన్ రెడ్డిని ఎదుర్కొనేందుకు హిందూ ఓటు బ్యాంకును ఏకం చేయడమే లక్ష్యంగా చంద్రబాబు ఈ వ్యూహాన్ని అమలు చేస్తున్నారు. రాష్ట్రంలో ఒక జాతీయ పార్టీకి ఉండవలసిన పూర్తి స్థాయి సైద్ధాంతిక బలం లేని చోట, తెలుగుదేశం పార్టీయే స్వయంగా ఆ భావజాలాన్ని మోయడం గమనించదగ్గ పరిణామం. రథయాత్రల్లో పాల్గొనడం, ఆధ్యాత్మిక కార్యక్రమాలను అధికారిక వేదికలతో మమేకం చేయడం ద్వారా పరోక్షంగా ఒక నిర్దిష్టమైన రాజకీయ వాతావరణాన్ని ఆయన సృష్టించాలని చూస్తున్నారు. అయితే, చంద్రబాబు అనుసరిస్తున్న ఈ తాత్కాలిక వ్యూహం పట్ల రాజకీయ పరిశీలకులు తీవ్రమైన దీర్ఘకాలిక హెచ్చరికలను వినిపిస్తూనే ఉన్నారు. ఒక పొలంలో విత్తనాలు వేసి, నీరు పోసి, సంరక్షించేది వేరొకరు అయినప్పుడు, చివరికి పంట ఎవరికి దక్కుతుందనేది ప్రాథమిక ప్రశ్న. చంద్రబాబు తాత్కాలిక అవసరాల కోసం హిందుత్వ రాజకీయాలకు నేల సిద్ధం చేసి, దాన్ని వృక్షంలా పెంచితే, భవిష్యత్తులో ఆ మహా వృక్షం ఇచ్చే ఫలాలను అసలు సిద్ధాంతం ఎవరిదో ఆ భారతీయ జనతా పార్టీయే అందుకుంటుందనేది చారిత్రక సత్యం. దేశంలోని ఇతర రాష్ట్రాలలో ఇదే తరహా వ్యూహాలను అనుసరించి తీవ్రంగా నష్టపోయిన ఉదాహరణలు అనేకం ఉన్నాయి. పశ్చిమ బెంగాల్‌లో లెఫ్ట్ పార్టీలను ఎదుర్కోవడానికి మమతా బెనర్జీ ఏ విధంగా జాతీయ భావజాల పార్టీకి ఎంట్రీ ఇచ్చి చివరకు తన పార్టీ ఉనికినే ప్రశ్నార్థకం చేసుకున్నారో, ఏపీలో చంద్రబాబు కూడా అదే బాటలో పయనిస్తున్నారనే విశ్లేషణలు వెలువడుతున్నాయి. ఆంధ్రప్రదేశ్ రాజకీయాల్లో ప్రస్తుతం చంద్రబాబు అమలు చేస్తున్న ఈ పరిణామాలు భవిష్యత్తులో తీవ్ర పరిణామాలకు దారితీసే ప్రమాదం ఉంది. ప్రత్యర్థి పార్టీ నేతను రాజకీయంగా కట్టడి చేయడానికి, వారి సామాజిక సమీకరణాలను ఎదుర్కోవడానికి హిందుత్వ రాజకీయ వాతావరణాన్ని ప్రోత్సహించడం తక్షణానికి తెలుగుదేశం పార్టీకి ప్రయోజనకరంగా అనిపించవచ్చు. కానీ, ఈ సిద్ధాంతం రాష్ట్రంలో గట్టిగా వేళ్లూనుకుంటే, ఆ ప్రాంతీయ పార్టీ కంటే నేరుగా ఆ జాతీయ సిద్ధాంతాన్ని బలంగా నమ్మే పార్టీకే ఎక్కువ లాభం చేకూరుతుంది. ప్రజల్లో సైద్ధాంతిక మార్పు వచ్చినప్పుడు, అసలైన బ్రాండ్ ఎవరి వద్ద ఉందో ప్రజలు అక్కడికే మొగ్గు చూపుతారు. ఈ ప్రాథమిక సూత్రాన్ని విస్మరించి, కేవలం ప్రత్యర్థిని దబ్బకొట్టడమే లక్ష్యంగా చంద్రబాబు తాత్కాలిక ప్రయోజనాల కోసం అడుగులు వేయడం భవిష్యత్తులో ఆయన పార్టీకి తీవ్రమైన రాజకీయ నష్టాన్ని మిగిల్చే అవకాశం ఉంది. రాజకీయ నాయకులు కేవలం క్షణికమైన అవసరాల కోసమే కాకుండా, దశాబ్దాల తరబడి నిలబడే విధానాల కోసం ఆలోచించవలసి ఉంటుంది. నేడు చంద్రబాబు సృష్టించే సైద్ధాంతిక వాతావరణం రేపు తెలుగుదేశం పార్టీ ఉనికినే ప్రశ్నార్థకం చేసే పరిస్థితి వస్తే అప్పుడు చేసేది ఏమీ ఉండదు. స్వల్పకాలిక విజయాల కోసం దీర్ఘకాలిక మూలాలను బలహీనపరుచుకోవడం ఏ అనుభవజ్ఞుడైన నాయకుడికైనా శ్రేయస్కరం కాదు. ఏది ఏమైనప్పటికీ, మారుతున్న రాజకీయ సమీకరణాలు, చంద్రబాబు వ్యూహాత్మక అడుగులు రాష్ట్ర భవిష్యత్తును మరియు ఆయన పార్టీ గమనాన్ని ఏ దిశగా నడిపిస్తాయనేది కాలమే నిర్ణయించాలి.