కేంద్ర మంత్రి బండి సంజయ్ కుమారుడికి షరతులతో బెయిల్!

కేంద్ర సహాయ మంత్రి బండి సంజయ్ కుమార్ కుమారుడు బండి సాయి భగీరథ్‌కు పోక్సో కేసులో షరతులతో కూడిన ఇంటరిమ్ బెయిలు లభించింది. ఈ మేరకు మల్కాజ్‌గిరి కోర్టు కీలక ఆదేశాలు జారీ చేయడం ద్వారా గత నెల రోజులుగా నడుస్తున్న హైడ్రామాకు తాత్కాలికంగా తెరపడింది. దేశవ్యాప్తంగా తీవ్ర చర్చనీయాంశమైన ఈ కేసులో ఈ తాత్కాలిక బెయిల్ మంజూరు కావడం ఇప్పుడు రాజకీయ, సామాజిక వర్గాల్లో హాట్ టాపిక్‌గా మారింది. ఈ వివాదానికి సంబంధించిన వివరాల్లోకి వెళ్తే, మే 8న పెట్ బషీరాబాద్ పోలీస్ స్టేషన్‌లో భగీరథ్‌పై తీవ్ర ఆరోపణలతో కేసు నమోదైంది. ఒక 17 ఏళ్ల మైనర్ బాలిక తల్లి ఇచ్చిన ఫిర్యాదు ఆధారంగా పోలీసులు లైంగిక వేధింపులు, అత్యాచారం కింద పోక్సో చట్టం నమోదు చేశారు. గత ఏడాది డిసెంబర్ 31న మొయినాబాద్‌లోని ఒక ఫార్మ్‌హౌస్‌లో ఈ దారుణ ఘటన జరిగినట్లు బాధితురాలి తల్లి తన ఫిర్యాదులో పేర్కొంది. కేసు నమోదైన తొలి రోజుల్లో బండి భగీరథ్ పోలీసులకు అందుబాటులో లేకపోవడంతో తీవ్ర ఉత్కంఠ నెలకొంది. దీంతో దర్యాప్తు అధికారులు ఆయన కోసం లుకౌట్ సర్క్యులర్ కూడా జారీ చేయాల్సి వచ్చింది. ఆ తర్వాత మే 15-16 తేదీల్లో తెలంగాణ హైకోర్టులో భగీరథ్ ముందస్తు బెయిల్ పిటిషన్ దాఖలు చేయగా, న్యాయస్థానం అరెస్టు నుండి తాత్కాలిక రక్షణ కల్పించడానికి నిరాకరించింది. హైకోర్టు షాక్ ఇవ్వడంతో మే 16న బండి భాగీరథ్ పోలీసుల ఎదుట సరెండర్ అయ్యారు. ఆ వెంటనే మల్కాజ్‌గిరి కోర్టు ఆయనకు జ్యుడీషియల్ కస్టడీ విధించడంతో దాదాపు నెల రోజుల పాటు జైలు శిక్ష అనుభవించారు. ఈ కాలంలోనే ప్రత్యేక దర్యాప్తు బృందం (SIT) భగీరథ్‌ను కస్టడీకి తీసుకుని విచారించడంతో పాటు మెడికల్ ఎగ్జామినేషన్ పూర్తి చేసి ఫార్మ్‌హౌస్ వేడుకల వివరాలను సేకరించింది. మే 21న హైకోర్టు ముందస్తు బెయిల్ పిటిషన్ ఉపసంహరణకు అనుమతిస్తూ, రెగ్యులర్ బెయిల్ కోసం ట్రయల్ కోర్టును ఆశ్రయించవచ్చని సూచించింది. ఈ నేపథ్యంలోనే మల్కాజ్‌గిరి కోర్టు ఇప్పుడు ఆయనకు ప్రయాణ నిబంధనలు, బాధితురాలిని సంప్రదించకూడదనే కఠిన షరతులతో కూడిన ఇంటరిమ్ బెయిలును మంజూరు చేస్తూ నిర్ణయం తీసుకుంది. రాజకీయంగా అత్యంత సున్నితమైన ఈ కేసుపై సోషల్ మీడియాలో భిన్నమైన అభిప్రాయాలు వ్యక్తమవుతున్నాయి. బండి సంజయ్ కేంద్ర మంత్రి కావడంతో ఈ వ్యవహారం జాతీయ స్థాయి దృష్టిని ఆకర్షించింది. భాగీరథ్ తరపు న్యాయవాదులు దీనిని "హనీ ట్రాప్, ఎక్స్‌టార్షన్" కేసుగా కొట్టిపారేస్తుండగా, పక్షపాతం లేని తుది తీర్పు కోసం ప్రజలు ఎదురుచూస్తున్నారు.