భారీ వర్షాల తర్వాత అమర్‌నాథ్ యాత్ర పునఃప్రారంభం!

శివ భక్తులకు అధికారులు గుడ్ న్యూస్ చెప్పారు. ప్రతికూల వాతావరణం వల్ల నిలిచిపోయిన పవిత్ర అమర్‌నాథ్ యాత్ర శనివారం రోజు మళ్లీ పునఃప్రారంభమైంది. వర్షాలు తగ్గడంతో పాటు వాతావరణంలో మార్పు రావడంతో అధికారులు యాత్రను కొనసాగించడానికి అనుమతి ఇచ్చారు. పవిత్ర మంచు లింగాన్ని దర్శించుకోవడానికి భక్తులు బాాల్తాల్ మార్గం ద్వారా తమ ప్రయాణాన్ని తిరిగి ప్రారంభించారు. ఈ ఏడాది పవిత్ర అమర్‌నాథ్ యాత్ర జులై 3న ఎంతో ఘనంగా ప్రారంభమైంది. అప్పటి నుంచి ఇప్పటివరకు దాదాపు 4.5 లక్షల మందికి పైగా భక్తులు పవిత్ర గుహను దర్శించుకున్నారు. అయితే శుక్రవారం రోజున కురిసిన భారీ వర్షాలు, దెబ్బతిన్న రోడ్ల కారణంగా అధికారులు భద్రతా కారణాల వల్ల యాత్రను తాత్కాలికంగా నిలిపివేశారు. దీంతో సంబంధిత రోడ్డు మరమ్మతు బృందాలు వెంటనే రంగంలోకి దిగి దెబ్బతిన్న రోడ్డు మార్గాలను యుద్ధ ప్రాతిపదికన బాగు చేశాయి. ఇదిలా ఉండగా శనివారం ఉదయం నుంచే బాాల్తాల్ మార్గం ద్వారా భక్తుల రాకపోకలను అధికారులు పునరుద్ధరించారు. మార్గం సుగమం కావడంతో భక్తులు తీవ్ర ఊరట చెంది పవిత్ర దర్శనం కోసం ముందుకు సాగుతున్నారు. ఫలితంగా బాాల్తాల్ మార్గంలో ప్రయాణం సాధారణ స్థితికి చేరుకుంది. ఈ నేపథ్యంలో కొండచరియలు విరిగిపడే ప్రమాదం ఉన్నందున ముందుజాగ్రత్త చర్యగా పహల్గామ్ మార్గాన్ని అధికారులు ఇంకా మూసివేసే ఉంచారు. అలాగే కొండచరియల వల్ల 250 కిలోమీటర్ల పొడవైన జమ్మూ-శ్రీనగర్ జాతీయ రహదారి కూడా పూర్తిగా మూతపడింది. భగవతీ నగర్ బేస్ క్యాంప్‌లోనే భక్తులను అధికారులు తాత్కాలికంగా నిలిపివేశారు. కొండచరియలు విరిగిపడిన ప్రాంతాల్లో ప్రస్తుతం వేగంగా పునరుద్ధరణ పనులు కొనసాగుతున్నాయి. ఆ మార్గాల్లో పరిస్థితులు పూర్తిగా అదుపులోకి వచ్చి అనుకూలించిన తర్వాతే ఇతర మార్గాలను తెరవాలని అధికారులు నిర్ణయించారు. రోడ్ల మరమ్మతులు పూర్తయితేనే నిలిచిపోయిన భక్తులను జమ్మూ నుంచి శ్రీనగర్ వైపు అనుమతించనున్నారు. ఈ పవిత్రమైన అమర్‌నాథ్ యాత్ర ఈ నెల చివరి వరకు నిరంతరాయంగా కొనసాగేలా ప్రణాళికలు సిద్ధం చేశారు. వాతావరణం సహకరిస్తే భక్తులందరికీ పవిత్ర దర్శనం దక్కుతుందని అధికారులు భావిస్తున్నారు. ఏజెన్సీలు అన్ని కూడా యాత్రికుల భద్రతకు అత్యధిక ప్రాధాన్యత ఇస్తూ నిరంతరం పరిస్థితులను సమీక్షిస్తున్నాయి.