డీప్‌ఫేక్స్ సృష్టిస్తే ఇక జైలుకే, అభిషేక్ శర్మ కేసులో సంచలన తీర్పు..

భారత యువ క్రికెటర్ అభిషేక్ శర్మకు ఢిల్లీ హైకోర్టులో భారీ ఊరట లభించింది. అతని వ్యక్తిగత హక్కులు, ప్రతిష్టను భంగపరిచేలా సాగుతున్న ప్రచారానికి అడ్డుకట్ట వేస్తూ కోర్టు సంచలన తీర్పునిచ్చింది. జస్టిస్ జ్యోతి సింగ్ ఈ పిటిషన్‌పై విచారణ జరిపి తక్షణమే చర్యలు తీసుకోవాలని ఆదేశించారు. అభిషేక్ శర్మ అనుమతి లేకుండా అతని పేరు, ఫొటోలు, వ్యక్తిగత హక్కులను వాడకూడదని స్పష్టం చేశారు. ఇదిలా ఉండగా, భారత జాతీయ క్రికెట్ జట్టులో ఎదుగుతున్న ఆటగాడిగా అభిషేక్ శర్మకు మంచి గుర్తింపు ఉంది. ఈ క్రమంలోనే కొంతకాలంగా అతని పేరును, ఫొటోలను కొందరు దుర్వినియోగం చేస్తున్నట్లు ఆరోపణలు వచ్చాయి. ఎలాంటి అనుమతి లేకుండానే సోషల్ మీడియాలో అసభ్యకరమైన పోస్టులు పెట్టడంపై క్రికెటర్ కోర్టును ఆశ్రయించారు. తన గుర్తింపును పాడుచేసేలా జరుగుతున్న ఈ సైబర్ దాడులపై న్యాయం కావాలని కోరారు. దీంతో ఈ వ్యవహారాన్ని తీవ్రంగా పరిగణించిన ఢిల్లీ హైకోర్టు సోషల్ మీడియా సంస్థలకు కీలక ఆదేశాలు జారీ చేసింది. ముఖ్యంగా మెటా పరిధిలోని ఫేస్‌బుక్, ఇన్‌స్టాగ్రామ్‌లతో పాటు పలు ఈ-కామర్స్ వెబ్‌సైట్లలో ఉన్న వివాదాస్పద లింకులను వెంటనే తొలగించాలని ఆదేశించింది. ఆర్టిఫిషియల్ ఇంటెలిజెన్స్ సాంకేతికతతో సృష్టించిన నకిలీ ఫొటోలు, వీడియోల వల్ల క్రికెటర్ ప్రతిష్టకు భంగం కలుగుతోందని న్యాయస్థానం అభిప్రాయపడింది. ఈ నేపథ్యంలోనే అభిషేక్ శర్మ అనుమతి లేకుండా అతని ఫొటోలను మార్ఫింగ్ చేసి అసభ్యకర వ్యాఖ్యలు రాయడాన్ని కోర్టు తప్పుపట్టింది. అలాగే అతని పేరు, చిత్రాలను వాడుకుంటూ టీషర్టులు, ఇతర దుస్తులను విక్రయిస్తున్న ఈ-కామర్స్ సైట్లపై ఆగ్రహం వ్యక్తం చేసింది. ఫలితంగా వాణిజ్యపరమైన లాభాల కోసం గానీ, సొంత ప్రచారం కోసం గానీ అతని వ్యక్తిగత హక్కులను వాడుకోవడం పూర్తిగా నిషేధించబడింది. ప్రతి వ్యక్తికి తమ గుర్తింపును, సమాజంలో ఉన్న గౌరవాన్ని కాపాడుకునే హక్కు ఉంటుందని జస్టిస్ జ్యోతి సింగ్ స్పష్టం చేశారు. డిజిటల్ ప్రపంచంలో ఆర్టిఫిషియల్ ఇంటెలిజెన్స్ దుర్వినియోగం పెరుగుతున్న వేళ, సెలబ్రిటీల పర్సనాలిటీ రైట్స్‌ను రక్షించడం అత్యంత ఆవశ్యకమని పేర్కొన్నారు. ఈ తీర్పు ప్రకారం తప్పుడు కంటెంట్‌ను ప్రసారం చేస్తున్న అన్ని ప్లాట్‌ఫారమ్‌లు తమ లింకులను తక్షణమే తొలగించాల్సి ఉంటుంది. భవిష్యత్తులో ఇలాంటి సైబర్ నేరాలు, డీప్‌ఫేక్ వేధింపులకు గురయ్యే సెలబ్రిటీలకు ఈ తీర్పు ఒక మార్గదర్శిగా నిలుస్తుందని న్యాయ నిపుణులు భావిస్తున్నారు. ఎవరైనా సరే చట్టాన్ని అతిక్రమించి నకిలీ కంటెంట్ సృష్టిస్తే కఠిన చర్యలు ఉంటాయని న్యాయస్థానం హెచ్చరించింది. అభిషేక్ శర్మ దాఖలు చేసిన ఈ పిటిషన్ డిజిటల్ మీడియా నియంత్రణలో ఒక కీలక మైలురాయిగా నిలిచిపోనుంది.