‘మా అమ్మాయిని చేసుకోండి’ అంటూ అభిజీత్ ఇంటికి ఫోన్లు

కాక్రోచ్ జనతా పార్టీ వ్యవస్థాపకుడు, నీట్ ఉద్యమ నాయకుడు అభిజీత్ దీప్కేకు పెళ్లి సంబంధాలు వెల్లువెత్తుతున్నాయి. నీట్-యూజీ పేపర్ లీకేజీ, పరీక్షల్లో అక్రమాలపై నెలల తరబడి జరిపిన నిరసనలతో ఆయన జాతీయ స్థాయిలో గుర్తింపు పొందారు. ఈ ఉద్యమం తర్వాత ఆయనకు పెళ్లి ప్రతిపాదనలు భారీగా పెరిగాయని ఆయన తల్లి అనితా దీప్కే స్పష్టం చేశారు. ‘మా అమ్మాయిని చేసుకోండి’ అంటూ చాలా మంది ఫోన్లు చేస్తున్నారని కుటుంబ సభ్యులు సంతోషం వ్యక్తం చేస్తున్నారు. మహారాష్ట్రలోని ఛత్రపతి సంభాజీనగర్‌కు చెందిన 30 ఏళ్ల అభిజీత్ దీప్కే, బోస్టన్ యూనివర్సిటీలో మాస్టర్స్ పూర్తి చేశారు. గతంలో ఆమ్ ఆద్మీ పార్టీ సోషల్ మీడియా విభాగంలో పనిచేసిన ఆయన, మే 16న సుప్రీం కోర్టు ప్రధాన న్యాయమూర్తి వ్యాఖ్యలను సూచిస్తూ సీజేపీ పార్టీని స్థాపించారు. నీట్ అక్రమాలపై ఢిల్లీలోని జంతర్ మంతర్ వద్ద నెల రోజులకు పైగా నిరసనలు చేపట్టి యువత పోరాటానికి ముఖచిత్రంగా మారారు. ఈ ఉద్యమ తీవ్రత ఫలితంగా జూలై 25న కేంద్ర విద్యాశాఖ మంత్రి ధర్మేంద్ర ప్రధాన్ తన పదవికి రాజీనామా చేశారు. ఇది యువత సాధించిన అతిపెద్ద విజయంగా మారింది. దీంతో అభిజీత్ కీర్తి దేశవ్యాప్తంగా పెరగడమే కాకుండా, ఆయనకు పెళ్లి ప్రతిపాదనల సంఖ్య ఒక్కసారిగా పెరిగింది. ఇదిలా ఉండగా, తమ డిమాండ్లు కొన్ని ఇంకా పెండింగ్‌లోనే ఉన్నాయని, పోరాటం కొనసాగుతుందని సీజేపీ వర్గాలు వెల్లడించాయి. ఉద్యమ సమయంలో అభిజీత్‌తో పాటు ఆయన కుటుంబానికి తీవ్ర బెదిరింపులు ఎదురయ్యాయి. ఈ నేపథ్యంలో తల్లిదండ్రులు కొద్దిరోజుల పాటు కొంకణ్‌లోని బంధువుల ఇంట్లో ఉండాల్సి వచ్చింది. ఫలితంగా అనేక మానసిక ఒత్తిళ్లను ఎదుర్కొన్న కుటుంబం, ఇప్పుడు ఆయన సాధించిన గుర్తింపు పట్ల ఆనందం వ్యక్తం చేస్తోంది. డిసెంబర్ లేదా జనవరి నాటికి పెళ్లి జరగాలని తల్లి ఆశిస్తున్నారు. ప్రస్తుతం టైఫాయిడ్ బారిన పడిన అభిజీత్ కోలుకుంటున్నారని, త్వరలోనే ఇంటికి తిరిగొస్తారని కుటుంబం తెలిపింది. బోస్టన్‌లో ఉన్న సమయంలోనే పెళ్లి ప్రస్తావన తెచ్చినా, ఆయన నవ్వి ఊరుకున్నారని తల్లి గుర్తు చేసుకున్నారు. ఇంటికి వచ్చాక మళ్లీ మాట్లాడతామని, కానీ తుది నిర్ణయం మాత్రం అభిజీత్‌దేనని ఆమె స్పష్టం చేశారు. అయితే పెళ్లి కంటే ముందు చదువు పూర్తి చేసి ఆర్థికంగా స్థిరపడాలని అభిజీత్ భావిస్తున్నారు. చిన్నప్పుడు చాలా నిశ్శబ్దంగా ఉండే ఆయన, నేడు జాతీయ టీవీల్లో మూడు భాషల్లో మాట్లాడటం చూసి తల్లి ఆశ్చర్యం వ్యక్తం చేశారు. ప్రస్తుతం అభిజీత్ తన దృష్టిని ఉద్యమం, విద్యా సంస్కరణలపైనే లగ్నం చేశారు.